تشتاق تحب تدوق وجع

تبعد وتمشي من سكات

تتحب تقبل تتخدع

تلقى الشعور فـ القلب مات

تصبر تعاني فـ وحدتك

تطلب ونس تلقاك وحيد

تمشي لنهاية سكتك

والحب ليه عنك بعيد

تتلام كلام يجرح قدر

يتشال فـ قلبك ألف آه

تتخان بقربك م البشر

تبعد و تزهق م الحياه

و تحب تاني تعيش كدا

فرحان و قلبك طار لفوق

تتساب عذاب الحب دا

ولا عمره حس بجرح شوق

تتخان كمان تأكيد جراح

تنزف تخاف تتشاف ضعيف

تندم ساعاتك ع اللي راح

تدبل كما ورقة خريف

تنسى اللي فاتك مجملاً

تبدأ تفكر من جديد

قلبك يحاول أولاً

يرفض يعيش تعبان وحيد

ترجع لنفس المشكله

والحزن ملهوش مرتجع

وتعيدها نفس المرحله

تشتاق تحب تدوق وجع ..

...................

أنا ابويا ربنا يرحمه
ويطيب الله ثراه
وصاني كل الخير اللي اعمله لله
وصاني عمري ما اسيبش أي صلاه
انا ابويا ده كان فيه كتير لله
قاللي يا ابني اخاف عليك م النار
الدنيا مهما طولت دي مزار
إياك تفكر فيها الاستقرار
في الجنة يا ابني هتلقى كل نعيم
بس انت عيش طيب بقلب سليم
وابعد عن الي عرفت إنه لئيم
وإياك تصاحب الخسيس الدون
لتشيل صفاته وتبقى مش موزون
فيقل وزنك وسط كل الناس
صاحبك ميزانك والميزان حساس
خد حكمة من ناس في الزمن سبقوك
وبلاش سذاجة وضيق نظر ياخدوك
كتفك تملي يكون في كتف أخوك
ما تروحش مع ناس للغلط شدوك
ولا تبني طوبة في روح بشر هدوك
عدّوك ومشيوا وأهملوك وسابوك
واعرف تمام الناس أوي يحبوك
لا تكون لهم مالك ولا مملوك
الناس هتقلب مهما هيعلوك
خليك يادوب إنسان هيحترموك
للحق تبقى لسان ولو رجموك
شيل العداوة من قاموسك شيل
ترتاح تنام متهني طول الليل
دا القلب لما يعادي يبقى عليل
وانا مش عايزلك علة تقضي عليك
بالخير تملي يا ولدي مد إيديك
أنا عمري صارفه يادوب عشان اربيك
والدنيا ماشية بيك ولو مش بيك
علشان كده أنا بنصحك خليك
في كفة الحق اللي عمره طويل
للحق ميل ميلك هيبقى جميل
عايزك تشوف الخلق بالإحساس
عايزك تكون وسط البشر وناس
الناس قلوب مش ملة مش أجناس
وإذا كنت تقدر سامح اللي أذاك
دا العفو قيمة زرعتها جواك
وأوعاك لتدبل أو يخيب مسعاك
وبلاش تشوف المال حصان لهواك
ياخدك لشهوة الافترا إياك
دا المال ضلال للمفتري وهلاك
وإن شوفت إن الفقر قلة مال
و الضيقة جت لك من حاجات ناقصاك
اعمل يا ولدي اللي نصحتك بيه
هتكون ساعتها من ذوي الأملاك

أنا نص بعيش

أنا نص بعيش

والنص التاني فــ روحي مافيش

وانا مش درويش

وباصلي واصوم

وبانام وبأقوم

وبقابل ناس

أشكال وألوان

أنا حد ضعيف

أصل أنا إنسان

بافرح أوقات

وساعات زعلان

أنا لون بيبان

وساعات بهتان

انا ضمة نون

انا خوف وجنون

انا اكتر حد

أمين بيخون

انا ضيق وبراح

احلام وجراح

انا مركب راسية

وموج سواح

انا شوق خواف

و عيون بتشوف

انا حلم جريء

وساعات مكسوف

انا ليل مستور

ونهار مكشوف

انا بحر كلام

على بحر آلام

أنا دمع سنين

وفَرَح أيام

أنا إمتى وليه

وإزاي وبكام

انا فيا حاجات

لكن فُله

انا لحن نايات

على بيانولا

انا باعرف

اشرب م القلة

وساعات باشرب

م التلاجة

انا فاهم

يدّي على سذاجة

أنا منكم

وأشبه لخواجه

انا قابل صوتك وباصدُه

انا عاوز شئ بس بـ اردّه

انا جزر البحر قصاد مدّه

انا شئ متصاحب على ضدُه

انا حاسس دلوقتي براحة

بصراحة باحس إن أنا تعبان

أنا ميت ميحسش راحة

انا عايش جداً أنا إنسان

انا عندي زهايمر وبافكر

وتملي بالاقي الوقت ما فيش

انا عارف جداً وبقاوح

انا باين جداً نص بعيش

بتفوت أيام

والماضي بيركب ع الأحلام

واقف فمكانك وكإنك

عمال ترجع لحاجات منك

وتعد سنين ويزيد سنك

لكن مبتطلعش لـ قدام

بتموت من جواك تدريجي

والناس كلها لما بتيجي

تسأل مالك بترد تمام

تتعلّق

تنجح وتقلّق

تفشل

تتخلّق وتقلّق

بتحاول على بكرة تحلّق

وتقول عادي وكلها أيام

بتبص لنفسك

مستغرب ..

وتشوف أحلامك خسرت كام

تلاقيك من غير أي مقاومة

عمال بتودّع ف الأحلام

قصيدة إحنا الحرافيش 2012

بنموت فـ سكوت وضروري نموت
ونظام بيسلّم للتاني
بنموت ببلاش حتى ما نسواش
لا تاريخ يذكرنا ولا أغاني
يا بلد خواجات حبة باشوات
حاكمانا وسايبانا نعاني
لو عشنا نعيش فـ إيدينا مافيش
بس التلطيش هنا مجاني
نتكلم ليه وسعادة البيه
بيبرأ فـ سعادة الجاني ؟
ملموم حواليه طُبل إنما أيه
تعرف تتلون فـ ثواني
إحنا الحرافيش ساكتين بنعيش
ننطق بنموت زي الفكّة
سُكّان فـ بلاد والخوف جلّاد
والجهل يا واد خلّاك سكّة
تعرف يا حسين لو شيلت فاسين
ونزلت الأرض تعيش رايق
لا علام ولا طين ما الناس ساكتين
والنخبة يا عم بتتضايق
خليك فـ قطيع .. اسمع أو طيع
مـأمـأ على ألحان السادة
أوعاك لتفوق أو حتى تدوق
نفسين حرية وتتمادى
خلّيك بلّاص أو عيش وخلاص
واستسلم للأمر الواقع
دولتنا حديد وروتينها جديد
موت واقف أو هتعيش راكع
ده كلام مكبوت وانا كنت هموت
لو كنت ماقولتش وداريته
توتة توتة خلاص موّالي يا ناس
إحكوه كدا زي ماانا حكيته

قصيدة عم بشير

عم بشير سنه كبير ..

عمره يعدي الخمسين عام

وسط بحور الصبر اهو عام

شقا من طلعة صُبح الخالق

فالق روحه لـ 100 إحساس

وسط الناس فـ الشغل مجرد

عامل عمره فـ يوم ما اتمرد

شيل بيشيل حطّ يحطّ

اعمل هنا خطين أو خط

ارفع لوح وسيخين وشكارة

تالت دور من تاني عمارة

كلمة حاضر كل ما عنده

رغم إن الأيام بتعانده

كل كلامه فـ حمد الله

عم بشير لو زعق مرة

وطِلعت منه حروف الآه

كل الدنيا حتسمع وجعه

لكن عمرها ما هي حسّاه

عم بشير أيضاً معلومه

حاضن فيروس C جوّاه !

الدايرة

الدايرة واخده شكلها
متقّفلة ..
والمشكلة ..
مش فين يكون الإرتكاز
الحب جايز أو مجاز
مسائل كلنا وألغاز
سليمة الروح ومكسورة
بتتعكّز بدون عكاز
تبان أرواحنا فـ الصورة
تبان مجروحة فـ البرواز
و قلب الدنيا مش شفاف
وقلب الناس مكانش إزاز
وحتى الوحدة مش كافية
مشاعر قلبنا الخافية
كانت خافية لكن باينه
مشاعر تانية كدا خاينه
كانت قادرة تعذّبنا
نقرب منها نتعلق
تقول عاشقانا وتسيبنا
ونمشي فـ زحمة الدنيا
ونعرف ناس ونتصاحب
بنكسب كل يوم أوجاع
ونخسر كل يوم صاحب
ونتجمع ونتفرق
وبنكدّب وبنصدّق
وبنحاور ونتحاور
وبنناقش ونتناقش
ومين ميت
ومين عايش
فنترحم على العايشين
ونذكر كل أمواتنا
فتيجي الذكرى بالأوجاع
و أوجاعنا تسكتنا
فنرجع تاني للأول
نوصل لنفس المسألة
الدنيا دايرة وللأسف
الدايرة دي متقفلة

محتاج اتشاف من جوايا قصيدة جديدة للشاعر علي خلاف

محتاج اتشاف من جوايا

محتاج اتشاف من جوايا
علشان الناس تعرفني بجد
أنا واحد عايش دنيايا

لا يحب يهين ولا يجرح حد

أنا بفضل وقت كتير ساكت

منعاً للغلط الغير مقصود

وكتير مبردش متعمد

خوفاً من سوء فهم المردود

أنا نفسي أعيش دنيا خفيفة

دفيانة بحب البني آدمين

بنفوس طيبة حلوة نضيفة

ما اسمعش فلان بيزم فـ مين

أنا نفسي الناس يفضلو عايشين

بيحبو لبعض الخير دايماً

محتاج الستر ورضا بالحال

وحبيبتي وشقة املاها عيال

واسهر جنبها فالبلكونة

تحضني بروحها المجنونة

واضحك فتقوم تعمل قهوة

محتاج دعوات كل حبايبي

علشان حفارقهم على سهوة

قصيدة ما انتاش ملاك للشاعر علي خلاف

ما انتاش ملاك

بتزهق تشخبط فـ دفتر حياتك

وتجري أوامك وتعمل هروب

ما بتلومش نفسك عشان اللي فاتك

وضيعته منك بعندك يا دوب

وبتحس إنك شهيد المشاعر

كأنك لواحدك بتشعر وبس

وتكتب دموعك ولا اجدعها شاعر

و ترجع محدش بدمعك يحس

ودا من غباء إنطواءك لواحدك

لانك بتمشي بنفسك فـ جنب

وبتلوم جميع اللي عارفك وسابك

برغم ان قربك فـ شرعك بذنب

يا واحد لواحدك وقلبك محمل

ما يمكن تبطل غباءك تعيش

مافيش حد مفرد بيقدر يكمل

ما تفهم يا كابتن وصدق مفيش

وقرب لكل اللي عايشين فِرِيحَك

و طيب جروحك دا ناسك كتير

بدل قلبك انت ما تلقاه جريحك

وتخلص لواحدك وسرك فـ بير

ضروري تعيش الحياه كالطبيعي

وتسكن قلوب اللي عايشين معاك

ولو يعني شايف فـ نفسك خرافه

فـ بص فـ مرايتك هتلقاك هناك

أكيد انت تشبه لكل اللي زيك

وصدق مرايتك . . وما انتاش ملاك

أبا القاسم

أبا القاسم ... انا وكل المسلمين فى حبك نتقاسم

فأشفع لنا يا خير خلق الله ..يا رحمة مهداه

أيا حبيبى ... ولدت بيوم كان خير أيام السنة

وأصبح مولدك يوم أحب ذكرى عندنا

إليك رسول الله أهديكَ .. عطر قلبى وبأبى وأمى ونفسى قبلهما أفديك َ

تمنيت حبيبى لو قدر لى أن أراك َ .. لوكنت أشد الناس لك قرباً فأرعاك َ

حتىوإن كنت خادمك فذا شرف .. لكل الناس أن تحظى بصحباك َ

فيا نبى الله لك حبى .. وأدعو الله اناستن سنتك فى قلبى

فأملك حينها الدنيا.. بأن امشى على نهجك وأن أرضى بها ربى

إهداء إلى حبيبى, وسيدى, وروح قلبى , ودفئ نفسى رسول الله محمد بن عبد الله فى ذكراه

ومهما تعالت النجمات فأنتى منهن اعلى

حبيبتى ونور عيونى وزهرة عمرى وريحانة بستانى

يزاورنى كل مساء .. شعور برغبة فى أن أجالسَ السماء

كى أروى لها عنكى يا سيدتى وأميرة كل النساء

وذات مرة حبيبتى .. جلست عنكِ أحاكيها .. فشعرت بأن حديثى عنك يعجبها ويرضيها

وإذا بالسماء تطلب منى أن أصف لها كيف أنتى ؟؟

فكان حبيبتى وصفى لكى كالتالى

أيتها السماء .. إليكى حديثى عن أجمل وأرق النساء

إليكى وصفى لمن سكنتنى وبرغبتى إستعمرتنى

هى الشمس .. إذا تبسمت .. أضاءت بسمتها كل ربوع دنياي

هى النور لقلبى ولبصيرتى .. وهى النور أيضاً لعيناى

هى أرق الورود .. كل النساء محتمل أنهن ورود

اما حبيبتى انا .. فهى نادرة الوجود

هى أجمل النساء مظهراً .. وأحسنهم جوهراً

هى الجميلة المتواضعه .. هى الخجولة الرائعة

هذا ما كان فى وصفى لكى يا حبيبتى .. فأرجو أن تتجاوزى عن ضعف كلماتى .. وعن فقر عباراتى

فى وصفى لكى ولجمالك يا سيدتى

وإليكى الان .. منى عبارتان .. تفوقان أجمل الالحان .. وألاف الاوصاف

أنتى لست نجمه .. فلا تهتمين بمن هنَ نجمات

فهناك نجمات من بين النساء .. وهناك نجمات فى قلب السماء

ولكنك عندى أغلى .. ومهما تعالت النجمات فأنتى منهن أعلى ... !

الصاحب الغالى " محمد أسامه "

فراقك أيها الصاحب الغالى

أتعبنى وأبكانى وزاد عبئ أحمالى

فراقك يا اخى يجرحنى ويمزق كل أوصالى

يا من عرفت الصدق صدقاً وكنت خير الرجالِ

أبكيك اليوم يا أخى وصديق عمرى وكل يوم

فبك يا حبيبى عرفت الإيخاء حقاً ومتعتنى بصدق المقالِ

فمن يصدقنى القول بعدك ومن يصبرنى عن زيف الوصال ِ

اخى وصديقى ورفيق عمرى وأفعالك كانت من أجود الأفعالِ

يسكنك ربى الجنة بيتاً وتكون لك خير دار

يا صاحبى امهلنى نظرة اخرى فلست بعارف مقدار نار ى

يا من بكتك كل أركانى واشعلت برحيلك فى قلبى نيرانى

يا اخى انت الذى مطلقاً لن أنساه حتى ألقاه بعالم ثانِ

صديقى اليوم عنى قد غاب .. كان اعز الاصدقاء وأعزة الاخوة وأحب الاحباب

صديقى وأخى .. فارقنى ولن ألمحه ولو مرة .. وبعده منذ الان .. فالحياة كلها مٌرة

أستحلفكم بالله أن تدعوا له الرحمة ...

كان انسان طيب أطيب من أى انسان وأحن من اى انسان

كان كل حاجة حلوة فيه .. كان ما لوش فى حاجة ربنا يرحمه يا رب

فى رحمة الله يا محمد

نبضات

نبضات بداخلى .. محجوزة ومكنونة وربما مدفونة

يهيم قلبى فيما يدور حولى ... فأجدنى دائماً لا ابرح الحزن

فلقد أعتدته درباً فى حياتى .. حتى فى ضحكاتى وفرحاتى

الحزن فى عالمى .. خيوط كما خيوط العنكبوت

نقوش فى القلب كِبار .. كما النقوش على الاحجار

لا تختفى تلك النقوش بمرور السنين .. كما أن جراحى لا يتوقف نزيفها ببعدها عن الجرح والجارحين

فأحلامى .. أكبرهمى ومبلغ ألامى .. ببعدها عنى .. تغيب أفراحى وتتركنى

فكلما سعيت فى الحياة .. طمعاً فى الوصول .. أجد باباً من خلفه أكثر من باب مقفول

لست اعبث بالكلمات .. لمجرد أن اسكب العبرات .. فدمعاتى أشد إحساساً بى مني

ولكنها حقاً نبضات .. ففى هذه اللحظات .. وخذنى قلمى لأكتب تلك الكلمات

فأجتذبت اوراقى .. لأوسعها ضرباً بعليل أشواقى .. ونواقص أفاقى .. وشهيق أختناقى

فوجدتنى أكتب هذه الكلمات .. ربما وجب على الصمت والسكوت ..

لكننى شعرت بأننى إن إلتزمت الصمت حقاً سأموت

ولهذا أساءت نفسى إلى نفسى بأن باحت بما هو مكنون وفى القلب مدفون

ولكن سامحونى .. فمحتوى قلبى اليوم كاد أن يقتلنى ويمحونى

أسف انى شيلتكم همى

يا حبيبتى

يا حبيبتى .. يا اغلى من رأت عينى

ويا اغلى من شعرت نفسى

ويا اغلى من سكنت روحى

إليكى نبض قلبى أهديه

إليكى دمى لحبك إن كان أرضاً فبدمى ارويه

وأكتب لكى بدمى كم احبك

إليكى فقط يا حبيبتى أعلنها أننى اتمناكى

فمنكِ فقط أستشعر الكلمات واستوحى العبارات

ذلك من وجودك ومن قربك ومن حنانك ومن صفائك وجمالك يا حبيبتى

لكى قلبى وكيانى , لكى عمرى ولكى كل زمانى

إليكى أهمس بجميل الكلمات علها قادرة على أن تصف لكى ما بداخلى

من خلجات نفسى التى تهواكى وتتمناكى وتحبك وتطلب رضاكى

يا من بقلبى قد هيأت لها سكناً وجعلتها سيدة روحى وسيدتى

وأعليتها عرش النساء وألبستها تاجاً فوق كل النساء

وجعلتها أعلى من كل ما هو عالى

وأغلى من كل ما هو غالى

إليكى يا حبيبتى كل شئ بداخلى , إليكى اهتمامى وإحترامى

ليس من ضعف ولا من خوف ولكن ... حباً لكى