الشاعر علي خلاف: جديـــــــــــــــــد

أنا ابويا ربنا يرحمه
ويطيب الله ثراه
وصاني كل الخير اللي اعمله لله
وصاني عمري ما اسيبش أي صلاه
انا ابويا ده كان فيه كتير لله
قاللي يا ابني اخاف عليك م النار
الدنيا مهما طولت دي مزار
إياك تفكر فيها الاستقرار
في الجنة يا ابني هتلقى كل نعيم
بس انت عيش طيب بقلب سليم
وابعد عن الي عرفت إنه لئيم
وإياك تصاحب الخسيس الدون
لتشيل صفاته وتبقى مش موزون
فيقل وزنك وسط كل الناس
صاحبك ميزانك والميزان حساس
خد حكمة من ناس في الزمن سبقوك
وبلاش سذاجة وضيق نظر ياخدوك
كتفك تملي يكون في كتف أخوك
ما تروحش مع ناس للغلط شدوك
ولا تبني طوبة في روح بشر هدوك
عدّوك ومشيوا وأهملوك وسابوك
واعرف تمام الناس أوي يحبوك
لا تكون لهم مالك ولا مملوك
الناس هتقلب مهما هيعلوك
خليك يادوب إنسان هيحترموك
للحق تبقى لسان ولو رجموك
شيل العداوة من قاموسك شيل
ترتاح تنام متهني طول الليل
دا القلب لما يعادي يبقى عليل
وانا مش عايزلك علة تقضي عليك
بالخير تملي يا ولدي مد إيديك
أنا عمري صارفه يادوب عشان اربيك
والدنيا ماشية بيك ولو مش بيك
علشان كده أنا بنصحك خليك
في كفة الحق اللي عمره طويل
للحق ميل ميلك هيبقى جميل
عايزك تشوف الخلق بالإحساس
عايزك تكون وسط البشر وناس
الناس قلوب مش ملة مش أجناس
وإذا كنت تقدر سامح اللي أذاك
دا العفو قيمة زرعتها جواك
وأوعاك لتدبل أو يخيب مسعاك
وبلاش تشوف المال حصان لهواك
ياخدك لشهوة الافترا إياك
دا المال ضلال للمفتري وهلاك
وإن شوفت إن الفقر قلة مال
و الضيقة جت لك من حاجات ناقصاك
اعمل يا ولدي اللي نصحتك بيه
هتكون ساعتها من ذوي الأملاك

الاول اعرفكم بنفسى عشان تعرفونى

انا عارف انكم اكيد لما تعاشرونى هتحبونى

ومش بعيد كمان تكرهونى " مفيش حاجه غريبة اليومين دول"

عشان مطولش انا اسمى على اصحابى بينادونى بــــ "لوشا "

بس انا سميت نفسى

Abo Shams

المهم عشان مطولش عليكم انتظرو منى كلمات اتمنى انها هتلقى اعجابكم لانها بتمس مشاعر كتير من الناس

وبتلعب على الوتر الحساس فى قلوب معظم البشر ان شاء الله

تقبلونى شخص جديد فى اسرتكم ويارب اعجبكم انا وكلامى

وفى الاخر ابعتلكم سلامى

سلامووووووووووز