حضن الرغيف بإيديه
ريقه ابتدا يجري
مدت أوام رجليه
كان نفسه لو يجري
يوصل بسرعه البيت
ويهدي جوع الآه
لكن بلا قصده
الصحة مش سعفاه
من أول إمبارح
سكتوا العيال م الجوع
واهو من يومين سارح
وفـ عينه بحر دموع
هيجيب منين وإزاي
ولا شغله ولا معاشات
ولا دولة تسأل فيه
لو حتى م الجوع مات
أثناء بكاه بالليل
مين اللي شاف دمعه
مش م الوجع لكن
صوت العيال سامعه
بيتمتموا جعانين
طالع أدان الفجر
يشكي لرب معين
مالهوش ونس غيره
وهيشكي بس لمين ؟
بعد اما صلى وقام
ماشي فـ طريق راجع
خبط الهوى شاله
طار عنه قام راجع
وطّىٰ يجيب الشال
لقى جمبه عشرة حنيه
بص بعنيه للسما
لقى روحه ردت فيه
أخد الفلوس مبسوط
والفرن زحمة وأيه
أول ما طلع العيش
قاله يا ريت بجنيه
أول ما مسك العيش
حضن الرغيف بإيديه !
#علي_خلاف
